الطيب الشيخ «مليون سلام»

ضى القمر

:: كــاتبة نشــطة ::
#1
مليون سلام
مليون سلام لي كل ميل
مليون سلام أبنوسي
لي باسق النخيل
***
سلام مُمْتد بطول النيل
بطعم العجوة والقنديل
***
سلام من مرة مليون مرة
لي كل زهرة في توتيل
سلام موصول يجيك رسول
مع كل قطرة للبترول
***
سلام من الجزيرة أمانه
لي الفي الغربة ولا معانا
من جمال ألوان حقولنا
وبي طعم سكر كنانه
زي حليب بقراتنا صافي
وطيبته من طيبة قرانا
***
سلام واعي وسلام خلاق
ليه كل البلد تشتاق
تتصالح كنائسنا ومساجدنا
نِداها يدوي في الآفاق
***
وشوق الأزرق الْدّفاق
لي حضن الأبيض الرقراق
جمال اللوحة وأحلى عناق
دروس وحدة ووئام ووفاق
***
سلام منصوص عليه عديل
في القرآن وفي الإنجيل
ومعروف من زمن قابيل
ما جات الحرب بي خير
***
وقالوا الصلح ديمه اخْير
حتى لو جاك بعد تأخير
درب الحرب ما نبراه
حتى لو كان قريب وقصير
***
سلاماً يسلّم الأمات
من وجعاً مخاضه عسير
سلاماً يعالج الأمراض
ونجْبُر بيه كل كسير
***
سلاماً يأمن العِربان
مع مِرحاتها وين ما تسير
نعلم بيه أولادنا معاني
الوحدة والتعمير
***
نسيّر بيه عرسانا
أبشرن يا بنات بي الخير
سحابات السلام عمت
وخيرها بلدنا أصلو كتير
 
أعلى أسفل