التيجاني حاج موسى «رسالة لبلدى/أمى الله يسلمك»

عزيزوغالي

:: كاتب نشـــط::
من ضل الضحى الرامى وشمس شتويه دفايه
وريحة البن لما يفوح في قلايه وفروة جدى
وصورة جدى لمن جيت امد يدى جدي يدينى
تعريفه بتقرأ الحمدو يالمبروك وبقراها عشان
تعريفة اللقاها واجود في القرايه كمان وايييك
يايمه والله زمان وسبحة بت الفكى والطوريه
والواسوق وسعف حبوبه والكوريه والحنقوق
وصوت سعديه بت جيرانا تشحد ليها في طايوق
وصوت عرفه لما تخمج الدلوكه غنايه وحبة فريك
لموهو لرمضان مصرور في مخلايا صور محفوره
جواي ومن يوم داك والليله ولى باكر عشان الزمن
غدار ومامعروف زمانا كلو خوف في خوف وايييك
يايمه والله زمان مشتاق يمه لملاح النعميه وريحه
صاجك المحروق لما تسوى طعميه وغباشة روب
وعن زحلوق بدور ارحل واجيك هناك ضاقت بي
يمه هنا بدور اتمسي بعيونك واصافحك ياحبيبتى انا
وصباح الخير علي عيونك اتارى الدنيا من غيرك
شينه وما بتندار ودى مره مراره وحاره زى النار
ولو بتدورى تعرفي احوالى في البندر من وين عايزه
ابدالك من وين ابدى بس من وين موشيتن غريب
وعجيب وشيتن كلو شين في شين هنا الزول العديل
ونصيح بعيش حياتو يوماتى بوشين وزولتى الحتى
حبيتها لقيتها براي بتحب زولين وايييييك يايمه والله
زمان وانا والحزن متواعدين شرابنا المر وطعامنا
المر وبنفرش من رصيف الزل فراش وغطى
وقرايتى الجيت عشانا مرات بمش تمامة عد او
قولى سد خانه محاضر داخل ومدرس مارق وكلام
في الحق وفي القانون وكان بكون عبارات جافه
جبخانه مخنوق يمه ناس تاكل في بعضيها وناس
اشباها زى الحوت بدور ارجع اجيك يمه هنااااك
ضاقت بي يمه هنا هموم وعزاب وعيشه ضنا
كفانى اتمسي بعيونك واصافحك ياحبيبتى انا وصباح
الخير علي عيونك دي قشت عينى من النوم معاى
بشيل هموم باكر قبل ما اشيل هموم اليوم واختها
خطواتى الاولى لحدى الباب وتبدا تدق طبول الباب
وخوطر تذهل الالباب واقابلك ياشوارع الجن وفي
جواي حاجه تئن واشد وتر الحزن والخوف وتموت
غنواتى يايمه ويخنقنى الغنى وتنتر في العروق
حمى وخيال بيتنا القديم يرجف وصور تنزاح وتتلم
وتانى وتالت يايمه واشوف بخيال حالم تشاور وترقص
السبحه وملامح العابد الصايم تشع فوق جبهتك سمحه
وشيبك بحاكى ضى النور مذدان يمه في الطرحه
وتبسمى لي امد ايدى واقول اتلافاك يا السمحه
ويتلاشى الحلم واصحي واتقطر عرق مالح ويسكن
فينى كل الهم واشم ريحة ندم جارح وارفس زى بخارج
الروح وزى عصفوره منجرحه فارقت الفضاء البارح
وتانى وتالت يايمه وهم وكل المدائن وهم غرقانه في
زخم الحضاره الغم حضاره بتحصد الانسان وتزرع
في مكانه لغموقصر القول شايل اللوم ويوما جابنى
للبندر وحتك يمه دا يوما شووم لابسنى الخجل من
راسي لى كرعى شايلو واحوم وادى الحاله في
الخرطوم بس عايش شقي ومهموم
********************
وانتى الله يسلمك ويديك لي طول العمر في الدنيا
يوم ما يألمك يا امى يادار السلام ياحسنى لوجار
الزمان ختيتى في قلبي اليقين يامطمنانى بطمنك
خيرك علي بالخير كتير يامرضعانى طيبه بالصبر
الجميل ياسعد ايامى وهناى لو درتى قلبي اسلمك
انا مهما افصح عن مشاعري برضو بخونى الكلام
وقولة بحبك ما بتكفى وكل كلمات الغرام يامنتهى
الريد مبتدأ يا اللى الله يسلمك ويديك لي طول العمر في الدنيا يوم ما يألمك​
 
أعلى أسفل