إنتصار محمد الحاج «كيف نبل الريق»

عزيزوغالي

:: كاتب نشـــط::
كيف نبل الريق؟؟؟
اهدى هذه القصيدة الى كل مرهف يصغى الى الاشعار بحب عميق ويتواصل مع الكلمات بفلسفة مفتاحها:( من القلب والى القلب)


الشديرة الخدرة الفاقدة عش الطير

الطوير الراحل بالفجر والليل

الغصون اشتاقت ليهو للقييل

العواصف ان هبت ما بتحيد وتميل

الشديرة الخدرة واقفة شادة الحيل

واقفة لامن جفت وساكنة عمق النيل

المراكب التايهة

تانى وين تنكاس؟؟؟

وين بنلقى الرايحة ؟؟؟؟؟

هى بتروح وخلاص؟؟

وين بنلقى الرايحة

الشعور فى الناس

المويجة العالية الكذبت غطاس

الغريق حين يرجع بفقد الاحساس

النجوم الغرقت فى وجود الناس

كل ليلة بفتش

بى عيون كواس

الرصيف امتد

والطريق مليان

الجموع الماشة

معركة ميدان

الخطى بتتعد؟؟؟

التراب مليان

بالخطاوى الجارية

لوحة فيها بيان

الطريق انشر

بصمة الفريق

والعطش كاتلنا

كيف نبل الريق ؟؟

وفى الفراق اسبابنا

الريال والشيك

والقلوب الجامدة

وما بتشاركك ضيق

والخيانة الكبرى

من نديد ورفيق

الخناجر السامة

من اعز صديق

البطينة الظالمة

الدايرة ما فى ايديك

والضهور التايهة

وما بتحس البيك

والخلوق الديمة

الا تطمع فيك

والبقولوا عملت

والبحسبو عليك

الزفير والشهقة

دون تلاقى شريك

حين تنام تتخيل

كم خشيم راجيك

وما اظن املت

لحظة بس فى الفيك

سوق عينيك جواكا

الله شن مديك

القليب الصادى

اليشوف لو رهيد

شان يودرشوقو

لا قنص لاصيد

يا بعيد اتأمل

صيدتك الفرهيد

ان تركت دريبة

ما اظنك تانى

يوم تعرف الريد

الحبيبة الصادقة

ياه ادى البتريد

البتحمل همك

ليك تمد الايد

التموت فى شوقة

موت بلا شهيد

البتحفظ صوته

زيى صلاة العيد

هى البنية المدت

الحنانا فنان

ام دواخلا سهلة و

دردر الضيفان

شوقة تمسك حملك

حين تعود شقيان

فى البوادى الشاقة

الطوعت عصيان

من دروب متباعدة

تسرق الانسان

شوقة حين تلفاها

تلقى ما يرضيك

الانيس والبسمة

واحترام يشجيك

فى الليالى الصعبة

قربها يقويك

وفى النوايب الكعبة

ايدة فوق ايديك

فى المساروالغربة

هينة ساهرة عليك

شهرزادك تحكى

شان تنوم عينيك

تحمى دايما ضهرك

ما بتحمل فيك

الكلام والهبشة

تنصحك تديك

الحقيقة المرة

وللغرام تسقيك

فى ليالى القرة

اصلو ما تخليك

دائما تنسر

قربهاينسيك

الشقى الفى الفرقة

والريال والشيك

وفى الفراق اسبابنا

الريال والشيك

المسافر لازمو

ديمة قلب شفيق

ومن تراب اوطانو

حفنة ديمة رفيق

ومن وصايا الرادو

ربنا يقويك

ديمة ويشد حيلك

ليك يضوى طريق

امشى ديمة موفق

قلبى راضى عليك

ومن حلال ارزاقو

نعمة يقسم ليك

يحمى دربك دايما

نغمة الشربيك

يروى ديمة صداكا

وما تضوق شهيق

تبقى دايما شعبة

راكزة مو شعيق

يى الخطاوى الثابتة

كو ولا الشعليق

النعال ما بيستر

فى القدم شقيق

والهدوم السمحة

ما بتدس ما فيك

والحمار ان غنى

مهما قال هنيق

والقمارى قمارى

حين يقوقن ليك

وانت ما بتضارى

الشعور الفيك

فاضحو ديمة جبينك

وربنا يغطيك

انت يا المتغرب

ربنا يغطيك

ربنا يغطيك

ربنا يغطيك​
 
أعلى أسفل