إبراهيم أبنعوف «الليلة أبكن ياعيون ... كتر وحيحك يا قلب»

ضى القمر

:: كــاتبة نشــطة ::
#1
أبكـن ياعيــــون


الليلة أبكن ياعيون ... كتر وحيحك ياقلب
وينو الزمان يهدي الحنان ... من غير وداع راح محتجب
***
ليه يابا راحل دون وداع ... ما قلت من دنياك تعب
دايرنا نحن نعيش وراك ... كيف بي قليباً .. متخرب
ولا القدر جبرك تسيب ... ناس ليها ياما كت تحب
في الحسرة والأسي الهموم ... والعبره والدمع البكب
***
غشاشة .. يا دار الزوال ... كل النعيم الفيك كذب
كل ما تجودي الناس بخير ... يلقوه .. شرك متقلب
يادنيا ليه بتشيلي أبوي ... يادنيا حار جرح القلب
ما هسّ كان بيناتنا نور ... واليوم دريبو علي صعب
***
مابيرحم الموت يابا زول ... دايماً .. مسلط للسلب
أتام عيال .. خراب ديار ... بكاي عيوناً تنتحب
هو القدر .. هو الآجل ... هو المسطّر ومتكتب
رغم العلوم إتقدمت ... ياموت دواك ما عرفو طب
***
جاني الخبر في يوم رهيب ... في نفسي أشوفو كذب كذب
غشوني يابا وقالو لي ... راجيك أخوكي المغترب
يابا .. ما شفت العلي ... لمن عرفتك أنت غب
الكون ده شفتو عكس بعض ... حتي الشمس طلعت غرب
***
جيت للديار مافي بال ... البال وراك تب منشطب
جيت للديار وطعم الفراق ... في حلقي مرّ مراً كعب
جيت للديار ابكيك ودمع العين ... يسيل يسكب سكب
يا أبويا وآ أسفي الشديد ... ما جيت قبال .. تنترب
***
روحت ما خليت غير ... ذكري المحبين للمحب
ذكراك مقدسة في قليب ... أرضعتو حنين القلب
ذكراك رسمتها في الخيال ... بين النجوم في ليل ضهب
ذكراك دايماً في صحاي ... وعليها من النوم أشب
***
بذكرك عند الصباح ... مندلي للمزروع تقب
وبذكرك نصف النهار ... في نومه والنسام يهب
بذكرك عند المغيرب ... جاي طالع بالدرب
بذكرك في كل صلاة حتي ... الجمع حين تسمع الآذان تتب
***
الهي أبوي عندك غريب ... أغفر لو كل ذله وذنب
وارسل سحاب الرحمة يوت ... فوق قبرو يتزاحم يكب
وتأنسو بحرواً حسان ... لا تتوصف .. لا بتحسب
وأقبل دعاي قول لي أبوك .. في الجنة لا شقا لا تعب
 
أعلى أسفل