أزهري شرشاب «عسل جيتك»

ا

ابو نمر

Guest
يَضِجْ نيلك ..
يزيد عَكَرَكْ
اذا ما انْدَهْدَهَتْ مَطَرَكْ
صِبِحْ جَرف المحنه قفار
تحت بَصَرَكْ
يشيل باقى السمح بَحَرَكْ
أمانيك يلفَحِنْ تيار
معَا سَفَرَكْ
حذارى تعّكِرْ الواطه
اذا غيم الولف هَجَرَكْ
وساقك لى زمن ودّار
ساوِمْ مره يوم قَدَرَكْ
وخالفْ للحُزنْ جُواك
اذا جواكَ يوم نَكَرَكْ
وشَتَتْ للنجوم اسرار
بِيَصَفى معَ الزمن كَدَرَكْ
نسِدْ طاقة المحن تالاك
على باب الأمل عندك
تقيف أقمار
نتابع فى الدرب أتَرَكْ
ونخلِفْ للجرح كىّ نار
يَبِلْ ريقك رزاز شوقنا
ويفيض أنهار
نكوس خَبَرَكْ
قبل باكر تجى الاخبار
سحيبات الدقش صابات
تغنى معاها بى وَتَرَكْ
تشيل نفس الصباح أسحار
يِصِحْ خَبَرَكْ
ويدفق عسل جَيّتَكْ
على رمل الدروب مشوار
ونلقاك فى زمن حَضَرَكْ
يَبَتِقْ فى الارض حِنَكْ
يشيل شوق الوِلِفْ نُوار
نقول دُرَرَكْ
وننسج للفرح موال
وَيِتْدَفَقْ سماح مَطَرَكْ
وتضحك نجمه من جُواك
يَبِقْ جوانا ألف نهار​
 
أعلى أسفل