أزهري شرشاب «آمنة»

ا

ابو نمر

Guest
آمنه يازفة مشاعر
آمنه يافرح الخواطر
إنتِ يازاد للمسافر
أبقى للناس لحن ساحر
وفى دروبهم رشى فرحه
وأبقى موسم مالو آخر

آمنه يا أنبل عواطف
الصدف دايماً تصادف
وبينا يحصل ده التآلف
آمنه يا صدق التعارف
أى زول للدمعة ذارف
كفكفيها الدمعة ليهو
فيك رهافة الشعرا شايف

آمنة يا أحزان مغادره
ويامواسم جات مهاجره
أبقى شاعره
غنى للدنيا وجماله
وكونى صابره
شيلى أحزان الحزانا
وأبقى للذات إنتِ ناكره
والبئن مرضان بيبكى
قضى ليلك جنبو ساهره


آمنه ياتيراب بلدنا
آمنة يا عزة أهلنا
إنتِ ياغرة عيونا
وإنتِ يا بهجة دربنا
ياشموخ بركلنا دايماً
ياجبلنا
إنتِ تاريخ فى جبينا
وفيكى يتحقق أملنا

آمنة يا العزه المهابه
أبقى أفراح للتعابه
وكونى شاعره
علمى الناس الكتابه
وأبقى أوتار فى ربابه
خلى كل الناس تغنى
تمسح الحسره وعذابه

آمنه حال الريده حالك
وليل شقانا أنحنَ حالك
الزمن لو كان صفالك
خلى حُب الناس خصالك
أى زول شيليلو ريده
وأمنحى المحتاج نوالك

قولوا لىَّ عن آمنه تانى
يمكن أقدر أقول عسانى
وفيها أنظم كم أغانى
وفى دروبه أرش حنانى
آمنه ما العزه البشيله
وآمنه حاضر عاد رجانى

آمنه أبيات فى قصيده
آمنه زحمة فال وريده
آمنه كل الناس تريده
أصلو دايماً بيضه إيده
تبسط الخير فى دروبنا
وتمسح الأحزان تبيده

آمنه وكت الليل يَهَوّدْ
تصحى نص الليل تغردْ
ولى غنا الحزنان ترددْ
وكتاً الأيام تعاند
وعاد سموم الريد تولقدْ
تبقى نسمة صيف تبردْ

آمنه بين الناس صلاته
زايده بالإخلاص غلاته
أصلو بهجة عيد حلاته
آمنه مابخسب صفاته
وآمنه ياها الدنيا ذاته​
 
أعلى أسفل