أرتيقة مصطفى الجيلاني «صرخة شوق»

ضى القمر

:: كــاتبة نشــطة ::
صرخة شوق


حليلك يا بشاير الخير
ووآ شوقاً
غلب صبرى
ودموع عينى
بشابيلك
واضمك ديمة
فى الاحلام
واقوم من نومى
مسكون بيك
بناديلك
واغزل ليك
حروف الشوق
عقود مروية
عطر الحب
وادوبيلك
وافتش فى
معاجم الريد
عن الاتقال
ولسة بكر
واغنيلك
حليلك يا صباح الفال
وكت تصغر
رحاب الكون
بعديلك
افتش فى حماك ملاذ
يطمن قلب
فيك عشمان
وماشيلك
القى مودة فى العينين
حنان بى فيضو اتهنى
وادعيلك
وبتذكر كلامك لى
وصاياك
ودميعاتك
ودعواتك
وخوفك من سفر
حا يطول
طريق الغربة
والمجهول
على وليدك
حنانك زادنا فى الغربة
حنانك هو البدفينا
تضمنا ديمة احضانو
تراعينا
وتداعبنا
وتواسينا
تكون لينا الامل والنور
قواربنا
وشراعاتنا
ومراسينا
بسيماتك من الخاطر بتتشابى
وتبقى الفال
وعشم اللقيا يوم باكر
منى وآمال
واجيك باكر
تسوقنى اللهفة
لى ايامك الناديات
ملان اشواق
بتفرش دربى لعيونك
بجيك باكر
تنوم ترتاح
عيونى الخاوت النجمات
تعيش افراح
دواخلى النازفة من الهم
وليل الغربة والاهات
بجيك باكر
واكون باكر
صباح العيد
صباح الفال
 
أعلى أسفل