أبو ذر بابكر «يا جاية من عمق الألق»

ضى القمر

:: كــاتبة نشــطة ::
يا جايه من عمق الألقْ

مرسومة بى لون الصفا

ومسقيه من روح العبقْ

يا شايله فى إيد الخريف

وخاتّه فى التانية الوفا

جايه وحِداكِ الأغنيات

كل الدروب

مرقت تبارك طلتك

تتمعنِك

مندهشه كيف

إنه الفراش إنضمَ ليك

سوَاك حديقة

وفيك سرحْ

وكيف الكلام

شايل حروفه ومشتهيك

سمّاك حقيقة

عشان يحاول يكتبك

عنوان فرحْ

وكيف الشمس

نِسَت الغروب

لِبست خُصل ألقِك طِرَح

بدل الشفق

يا جايه من عمق الألق


جايه ومعاك الأمسيات

نشوانه بى معنى الحضور

نتقاسم اللحظات هدايا

شويه ريد

وشويه عيد

شويه زهرات للفريق

وشوية غنوات للصبايا

وكل ألوان البريق

تشعل تفاصيل الحكايه

تعلن صباحك

ونشوة الريد الدفَق

يا جايه من عمق الألق


يا جايه زى لحناً رزين

ممدود على وجع الوتر

موسق خطاويك بالحنين

يا طلتك

ضحكة نجيمه بعيدة عاشقه

وغمزة فى وجنة قمر

رعشة رذاذ جوه الغيوم

يا طلتك

شبَال مزخرف بالنجوم

يا طلتك

إشراق سنا

وإيقاع مدوزن فى نسق

يا جاية من عمق الألق

يا مارقه من ضو القصيدة

وطالعه من زهو النشيد

نشوان مقام الريده

فى زحمة غناى

طربان مبلل بى شذاكِ

ودمعة الفرح العنيد

روّضْتّى حزن الليل معاى

جيتك وطن

خليت اساى

ومعاكى خلتنى المحن

معاكى فارقت الشجن

جيتك وطن

فُتَّ المواجع و الرهق

يا جايه من عمق الألق
 
أعلى أسفل