يوميات مدهول ، كلاكيت تاني مرة

خالد بيرم

:: كاتب نشـــط::
..خفة مني
.....لالالالا ..الجلاكسي دا ما شبهي ولا بنفع معاي ... احرجني وبهدلني وخلاني اتدردق في الواطة .. مقر ومعترف انو انا خفيف .. الله خلقني خفيف اسوي شنو ؟ من كم يوم فتحت الواتساب . لقيت اسم واحدة وبالامارة كاتب اسم الدلع بتاعها.. وكل ما تجيني نكتة في الواتس .. اشيل وارسل ليه في النكات .. شباب الهند (اديبور) يرسلو فديوهات وصور واغاني هندية وانا الخفيف اشيل وأرسل ..والعجب الالغاز ما خليت لغز ما رسلته ليها .. زاكرة تلفونها بتكون طرشقت من خفتي .. اصحابي يرسلو في الشعر ..وشي روابط بتاعت مواقع .. وشي قصائد من حبيبنا الهويس هشام الجخ ..حتي جدادي يلقط الحبة رسلتها ليها.. وشي كروت ملانة زهور وصباحات ورد ومساءات نور بتجي من الاهل والحبان وانا ادوس وارسل ليها .. ومرات اتخفف واقول ليها شنو التقلا دي ومعاها ايقونة قمزة عين وكشيرة ومرة افك ليها قلب يقعد يدقدق براه .. المهم اي نظرية في الواتساب طبقتها فيها .. ولمن فاض بيها وزهجت ردت علي . انت او انتي مني؟ .. ورديت ليها سجمي ما عرفتيني يا ام غبا ..نظام الود بخفف في دمه .. وردت علي بحزم والحزم دا عرفته من حروفها ..للمرة الأخيرة ..انت او انتي منو ..ومعاها طن علامات استفهام طوالي راجعت الرقم .. حسيت انو انا ما انا لمن لقيت الرقم اول مرة اشوفه ولا حصل مرا علي .. بس المحيرني انو الرقم دا جا من وين؟.. اكيد بتكون دي مؤامرة صهيونية .. اليهود ديل قاصدني عديييل .. مش اي دولة لمن تتزنق بتقول دي مؤامرة صهيونية .. وهسع انا مزنوق زنقة ليبيا وسوريا والعراق واليمن وسيناء مع بعض .. بفتش لي ضفر ادسا فيه....كسرة للبت الحديقة..
..دا حال الزول البتخلي عنه وطنه ..و احيييي ي وطني لو كنت لسع ساكن جواك ..ما كان اتغربت بين حيطانك ولا اتبهدلت ولا في الوتساب اتخففت..وبرضو التنصيب والانتخابات زي القميص الكاروهات
 
رد: يوميات مدهول ، كلاكيت تاني مرة

كلما اتجه شرقا تزداد هي في البعد غربا ..
كانت البداية حين التقيتها في قاع عاصمة الامبراطورية التي افلت شمسها واصبحت تعرف بعاصمة الضباب حيث يقع حي ام ضهب في اقصي جنوب العاصمة وحيث كان لقاءنا الاول عند الجسر الذي يسبق تقاطع شارع دفق البول مع شارع الدجاج غمض ..ونسبة لضبابية العاصمة قد يحتار الزوار للندن وحتي المقيمين فيها لهذه الاسامي ..ام ضهب ..وشارعي دفق البول والدجاج غمض وقد يكون لم يروها او حتي سمعوا بها ..ولكن انا كان لي الحظ في معرفة حي ام ضهب او الضاحية كما يحب ان يطلق عليها سكانه ..وقد خدمني الحظ عندما كنت استغل قطار ويلز متجها للندن في ان التقي بصديقي الويلزي بريز كانون والمقيم في ضاحية ام ضهب لم اصدق ولم يصدق فكان العناق حارا وبعد اجترار زكريات اخر لقاء لنا والذي كان قبل سنوات في شرق المعمورة ..فسالني اين اقيم في لندن فلم يجد عندي اجابة ..وكان صديقي يجيد العربية وتحديدا اللهجة السودانية العزبة فقال لي: ولا يهمك يا زول ..حتنزل معاي في ام ضهب ..فاجبته باستغراب :بريز انت جنيت ..ام ضهب شنو الفي لندن ..فابتسم صديقي وانا اعلم بان ابتسامة بريز وراها العجائب ..فقال لي :ام ضهب دي اجمل ضاحية في لندن وشايلا جمالها من طيبة سكانها فهي مزيج من ضهبانين العالم وفيهم الكثير من الانجليز زي كدا ..والضهب عندكم في اللهجة السودانية هو الضياع ..وابرز شوارع ام ضهب هما شارعي الدجاج غمض ودفق البول ..فقلت له :اها ياود كانون ..دي سرقة لانو الاسامي دي ما عندها علاقة لا بالانجليزية ولا باي لغة غير لهجتنا نحن السودانين ..فاجاب : انت عوير يا زول ولا عضاك نعجة ..نحن اصلا استعمرناكم ليه ؟ ما عشان نسرق تفاصيلكم الصغيرة وعليك الله ما تقاطعني وخليني اتم ليك قصة الاسامي دي واخذ بريز في التسرسل في الحديث عن شارع دفق البول والجداد الغمض ..فشارع الجداد غمض دي نسبة لان اغلب سكان الشارع هنود وكانوا يعملوا النهار بطوله ومع غروب الشمس تجد الشارع خالي من المارا فكل سكانه بقرشو بدري يعني زي الدجاج بمجرد ما يدخل الليل بنومو ..اها اما شارع دفق البول عكس الدجاج غمض تبدا فيه الحياة بعد المغرب ويسكنه افارقة وسمي بدفق البول لعدم وجود حمامات وكان السكان ينتظرون يحل الليل ليدفقو في الشوارع ما بالوهو نهارا..فخرجت مني ضحكة جعلت كل ركاب القطار بان يصفوني بالغجري ..هذه قصة الاسامي وطبعا هذا التعريف خاص لسكان لندن حتي لايفاجؤ بتلك المسميات ..ونرجع لقصة لقاءنا الاول ..كنت انا بعد ان اقمت مع صديقي بريز نزلت من البيت باحثا عن ثمار الدوم فكنت علي يقين باني ساجد دوم طالما شوارع ام ضهب بهذه المسميات ..وكانت هي تحمل فكرتي وحاجتي تبحث عن الدوم في شوارع ام ضهب والتقينا عند التقاطع ..قد يكون تشابه السحنة هو الجازب فوقفنا وجها لوجه وفي نفس اللحظة خرج السؤال مني ومنها ..القا دوم وين ..فضحكنا كثيرا فاتفقنا ان تتجه هي غربا وانا شرقا ومن ساعتها لم نلتقي مرة اخري ..ولكن تركت في داخلي اثرا لازال يحرضني للبحث عنها في شوارع لندن
 
رد: يوميات مدهول ، كلاكيت تاني مرة

يقطع سنينك يا عم ويكليس ..يعني كان في داعي تعمل فيني كدا ما كفوك الناس المشاهير جاي تفتش علي انا .. لكن ارجع واقول انا السبب الخلاني اعلم الولية تدخل النت شنو؟
اها شفتو الولية مبسوطة ولا مة نسوان الحلة وبتستعرض ليهن في مهاراتها الالكترونية ..وفي غمرة النشوة قامت قالت لي نسوان الحلة النت دا فيه اي حاجة يعني مثلا لو كتبتو اسم فلان يقوم النت يجيب ليكم خبر فلان دا .. ولي شلاقتا قامت كتبت اسمي ... وفجاءة كدا يقوم ينط ليها اسمي في موقع ويكليس النسخة العربية ..اها الشمار قام كتلا وراحت فاتحا الرابط (علاقة عاطفية بين هيلاري كلينتون وخالد بيرم) وفجاءة كدا الثكاليب ملت الحلة والكانت غايبة جرت توبا وجات علي بيتنا تشوف الحاصل شنو؟ اها والولية تنبح الخاين الوسخ يخوني انا ومع منو ؟ مع مرا قدر امو.. وطبعا نسوان الحلة مقهيات وما عارفين حاجة ...
.. نواصل
 
رد: يوميات مدهول ، كلاكيت تاني مرة

المشهد الثاني من فضيحة ويكليس
كلاكيت اول مرة: كثيرا ما اهرب من البيت .. واروح علي شاطئ النيل واقعد اشرب القهوة عند بتاعت الشاي .. القاعدة بالقرب من البنطون .. اها في اليوم داك كنت مشتري موبايل جديد وعاجبني شديد .. وكل مرة ارفع الموبايل واتمعن فيه ما اصلو عاجبني شديد .. وفجاءة كدا جاني مس كول ومن رقم عجيب وغريب .. وكان مفتاح الدولة يبدا بصفرين واحد .. واتكرر المس كول .. وانا ضارب الطناش اصلا انا عارف انو في بنات بتحب تشاغل وتقعد تمسكل ليك ولا ترسل ليك رسالة :(اشتقتللك كتير ولصوتك.. بلييز ارجعلي) ..وتبقي داقس لو اتخففت ورحت اتصلت .. ثانية ثانيتين ويكون رصيدك اتلحس .. والتلفون يرن وانا مطنش .. وبعد فترة جاتني رسالة من رقم غير الرقم الاول لكن مفتاح الدولة يا هوو يا زاتو .: وكانت الرسالة كلاتي :انا جورج بوش الابن اتصل علي في الرقم العملت ليك منه مس كول ) وكانت الرسالة بلغة انجليزية ركيكة اصلا الامريكان ديل مكرهين الانجليز في لغتهم بلهجتهم الهجين دي .. المهم انا قلت اخسر لي جنيه وارد علي الرسالة ورحت كاتب وبلغة انجليزيه من امها تعقد شكسبير ذات نفسه .. ( قديمة يختي شوفي غيرها .. وبعدين لو انتي بوش بامارة شنو اعرفك بطلي حركات الشــ ... دي. دا نحن مقددنها ياعم بوش انتي) وضحكت بيني وبين نفسي ضحكة خبيثة .. لكن تاني من رقم تاني جاتني رسالة تاني وبلغة قمة الركاكة ( عشان قاطع رصيد ما عايز تتصل علي .. ياخ انا بوش وبامارة لمن ابوي كان نائب رئيس جاكم السودان وهرب الفلاشة ودفن النفايات عندكم .. وبامارة انكم بعد زيارة ابوي بقيتوا تقولو لفتة الفول بووش .. صاح ولا انا كضاب) اها بعد الرسالة دي قلبي اكلني وقلت يمكن يكون بالجد دا بوش .. ومية جنيه ما خسارة عليه وهزيت راسي وقلت ارحمو عزيز قوم زل ومنها برضو يكون عندنا سالف علي بوش الولد و نرجع للعرب شوية من كرامتهم المسح بيها الارض وقلت النشوف الراجل دا عايز شنو؟ وهاك يا رصيد البي مية جنية ورحت متصل علي عم بوش .. وهو ما صدق من اول رنة راح فاتح الخط قائلا : ياخ كرهتنا ياخ.. طبعا الامريكان معروفين الواحد فيهم يكون مفلس ويقل في ادبه ..ورحت قايل ليه : يا اخين اختصر وخش في الموضوع ..
راح سألني : انت الكلام النزل في موقع ويكليس دا بجد ولا دعايه لانو لو طلع جد حنكون سددنا للديمقراطيين ضربة في الصميم.
اها وبعجرفة العرب رحت رادي ليه: ويكليس بتاع حنانك يا ابا .. خلاص نزلت المعاش وقعدت تخرف .. اها ويكليس مالو بي ؟
رد وبنفس اللغة الركيكة : قال انت عندك علاقة كدا وكدا مع هيلاري كلينتون .. ونحن عايزين نتأكد منك ... في الساعة ديك طق طرق دقت الولية في راسي .. وجدعت الموبايل وقلت سجم رمادك وهاك يا جري علي البيت .. دا انا خليت اللابتوب للولية وعلمتها القوقل سيرش ... وست الشاي بي وراي تكورك حق القهوة يا اخينا وانا بقيت ما انا ...
........واكيد ح نواصل
 
رد: يوميات مدهول ، كلاكيت تاني مرة

يوميات مدهول
المشهد التالت.. من فضيحة ويكليس
كلاكيت اول مرة
كان عبد الجبار يجلس علي ضل الشاتي .. والما عارف ضل الشاتي ما يسألني . وطبعا نحن اتعودنا لما يكون عبد الجبار قاعد في ضل الشاتي دا معناه انو بكون عامل شمطة مع مرتو الشول .. وفي اليوم داك كان فعلا مكاجر الشول ومتغالطين في رطل السكر بقي بي كم .. لالا ما تستغربوا نحن عندنا الما عندو موبايل ومشترك في خدمة (سعر الثانية) ... بكون برا الشبكة .. لانو اخر حاجة اتوصلت ليها الحيكومة انو .. يعملو خدمة اسمها سعر الثانية عشان المواطن يكون متابع سعر السلع ثانية بثانية اصلو حيكومتنا دي عندها اي حاجة بنظام .. عشان ما يجي واحد ويقول والله انا ما عارف الحاجة دي بقت كدا متين قامت الحيكومة عملت الخدمة دي .. وعمنا عبد الجبار نظام دغالة منه جاب موبايل بالدس وبدون علم الشول وطبعا لا بتصل بي زول ولا حد بتصل بيهو .. بس كل هم انو يعمل خدمة سعر الثانية عشان يعرف سعر السلعة في الثانية والدقيقة ويجي يسال منها مرتو الشول .. وطبعا الشول اصلا برا الشبكة .. من القرش والتعريفة .. برضو مافي زول يسالني ويقول لي قرش وتعريفة ديل شنو كمان ؟ لانو ح اتماسخ واقول ليه دي حاجة كدا ظهرت بعد المليم .. هسع المليم دي خليتونا نطراها مالكم .. اها نرجع للشول وعبد الجبار .. تجي الرسالة لعمك عبد الجبار انه في الثانية الفلانية من الساعة العلانية في يوم كذا زادت السلعة الفلانية كذا الف جنيه واصبح سعر الثانية لهذه السلعة كذا الف جنيه .. وعبدالجبار يجي جاري لشول .. انتي يا الشول رطل السكر بكم وترد ليه الشول بسعر السنة الفاتت ويروح يقول ليه يا ولية انتي خرفتي ولا شنو؟ والله سعرك دا زمن الانجليز ما في .. انتي ياوليه خرفتي وراحت عليك .. وتروح الشول رادا ليه .. وكتين خرفت عايز بي شنو ؟ ما تغور عرس ليك واحدة صبية بدل ما قاعدلي كدا زي الهم في القلب .. والشمطة تقوم ..ما علينا .. نرجع لعمنا وقعدة ضل الشاتي وماسك الموبايل وراجي تجيهو رسالة بسعر الثانية .. وفجاءة سمع ثكاليب .. يا ناس الحلة الحقوني .. الراجل الما بختشي يعمل علاقة مع مرا قدر امه .. وطبعا لمن تكون في مشكلة في الحي دي اللحظة الوحيدة البتفقوا فيها عبد الجبار والشول ويروحو يستلموا المجالس وهاك يا حنيس ووساطة .. اها عبد الجبار لمن سمع صوت الثكاليب جري للشول : تعالي يالشول الحلة فيها شمار والصواريخ جايا من بيت الود المبرم شعره الاسمو خالد .. والشول من الفرح جات جارية ونست تلبس توبها .. يلا يا راجل نشوف البت دي مالها .. اها الشول وعبدالجبار في طريقهم لبيتنا.......................
 
رد: يوميات مدهول ، كلاكيت تاني مرة

سمعنا انو المدهول " عديل " حبيب البت الحديقة الشايلة الوان في طريقها
بس المسخوت الوداها بلد الضباب شنو والنظر من يومو رهاب رهاب
:005:
 
رد: يوميات مدهول ، كلاكيت تاني مرة

يوميات مدهول
SorrY Vج¶aج¶lج¶eج¶nج¶tج¶iج¶n*ج¶eج¶Dج¶aج¶yج¶ I'm SiNGLE !!
والله السنة دي يا عم فلنتاين ما عندي ليك حاجة ... بيار نهي يعني حب مافي واحتفال بالحب بح ... مع انو السنة دي كنت مزبط نفسي ومجهزا علي الاخر .. ما في حاجة حمراء الا واشتريتها .. تي شيرت احمر وجزمة حمراء وشراب احمر والعجب الدبدوب حلا وحمار .. هسع يجي ناطي واحد ويقول لي عملت شنو ؟ مع الوليه وحكاية هيلاري كلنتون .. ح اقولليه بطل الشفقة .. مش قلنا ح نواصل يبقا ح نواصل .. وازيدكم شوية .. اشتريت هد باند وهاند باند حمر .. بس لكن زي ما بقول المثل تأتي السفن والخيل تجقلب .. ايوا دا مثل وعاجبني كمان ... قبل كم يوم ركبت في راسي اشتري سلطة خضراء فيها اي شي بتعمل في السلطة .. ورحت للخضرجي وقلت ليه بالله زبط لي سلطة فيها اي شئ يعني ما تخلي شي .. وعمك ما قصر لقط اي خضار عندو .. وقال لي هاك دا زعتر دا من عندي عشان السلطة تتزبط .. اها شيلت كيسي ورحت للوليه وقلت ليها : خدي زبطي لينا السلطة دي واول ما فتحت الكيس شالت الزعتر وقالت لي دا شنو الجايبو لينا دا .. قلت ليها زعتر دا بخلي السلطة حاجة كدا .. اها تاني يوم جيت شايل ليها سلطة طماطم وعجور بس .. مع فتحت الكيس هبت فيني .. جايب لي سلطة من غير زعتر .. انت مش عارفني ماباكل السلطة الا بالزعتر .. وطبعا اندهشت قلت ليها : عرفت من متين .. ولا اكون انا متزوج الشهيدة سناء المحيدلي ولا انتي مولودة في تل الزعتر وانا ما عارف .. قامت ردت لي :هي هيييييا دا انا اربعين سنة ما باكل السلطة الا بالزعتر .. وطبعا انا ما عكليتا بس مسكت في الاربعين سنة دي .. قلت ليها : يا وليه خافي الله انتي مش قبل اسبوع قلتي الليلة عيد ميلادك الخمسة وعشرين وشبكتيني جيب لي تورته وخمسة وعشرين شمعة .. ولا تكون امك كان بتاكلك زعتر في بطن حبوبتك ... بس حكاية الاربعين سنة دي زعلتها ولملمت هدومها وعدل علي بيت امها .. وانا كمان قلت والله التي شيرت والجزمة حمر المحضرهم لعيد الحب ما يروحو سااي .. وطلعت علي اقرب ست شاي وهاك يا كتيل كلام وسبيل عيون .. والسنارة قمزت .. اها شي شاي وشي قهوة .. وفجاءة بتاعت الشاي قالت لي : انت بتهبني .. قلت ليها : ايوا بحبك واحب ابوك وابو اهلك زاتو .. وطوالي راحت خاشا فيني شمال : بس انا عايزا منك هدية .. قلت ليها اطلبي يا ست الناس .. قالت لي : عايزة في عيد الحب تجيب لي شاحن نوكيا اصلي ... وطبعا انا ما عرفت اندهش ولا اضحك .. وقلت لي نفسي وطيب الدبدوب الاحمر اوديهو وين .. وقلت ليها : شاحن نوكيا اصلي ليه يا بتنا .. دا حتي موبايلك صيني وشاحنه مشط .. قالت لي : بس دا شرطي تجيب شاحن نوكيا اصلي .. حبكانا في ما جيبتو .. نفركش وكل قرد يطلع جبله .. قلت ليها : لالالالالالا شاحن نوكيا اصلي .. وجري علي محلات الموبايلات .. ولامن كرعي حفن شاحن الجن ما لقيتو .. كل صيني .. حتي وصلت لي واحد قال لي ما عندك حل غير تشتري موبايل كرت كرتونة فنلندي ولا هنغاري عشان تلقي شاحن اصلي .. قلت ليه يا ولدنا الفهم شنو؟ يعني اشتري الموبايل اشيل الشاحن واجدع الموبايل ولا شنو ؟ .. واخيرا قلت انا اجيب ليها هدية احسن ليها من شاحن النوكيا الاصلي الاصلا ما عارف سره دا .. ومشيت عليها .. ومديت ليها صندوق مرهم لوكسيد ار وقلت ليها رايك شنو؟ مش احسن من شاحن النوكيا الاصلي .. ولسع ما تميت كلامي .. وكان في ايدها كباية شاي وراحت فنتني بيها .. وزي الكلب قعدت تردح : انا تجيب لي لوكسيد يا ود الـ .... وهاك يا فكيك كرعيني مرقوني منها .. ولعنت يوم الحب وابو الحب زاتو .. وقلت لنفسي فلنتاين يجيب ليه ود الـ... دا ما لازمني .. بس حسرتي علي الجزمة والتي شيرت الحمر ماغصني شديد .. والعجب الدبدوب ...
 
رد: يوميات مدهول ، كلاكيت تاني مرة

سمعنا انو المدهول " عديل " حبيب البت الحديقة الشايلة الوان في طريقها
بس المسخوت الوداها بلد الضباب شنو والنظر من يومو رهاب رهاب
:005:
... ونحن برضو سمعنا بسبب السفر الكتير لي لندن ، تم حجر المسخوتةً
 
رد: يوميات مدهول ، كلاكيت تاني مرة

رد: يوميات مدهول
....... الليلة نفسي في وجبة كافيار ... اااي كافيار .. مالكم ومالي مش نفسي خليها تشتهي زي ما عايزة .. طيب لما اللمبي سألوه بترشح منو لرئاسة حماس وقال ارشح راغب علامة . كان في زول سالو ولا ضحك فيه .. وبرضو لمن ولده الرضيع جاءه اسهال والدكتور قال ليه سبب التسمم انه شرب لبن مدته منتهية وقام لمبونا قال ليه تكون رضعتو حبوبته اصلها من ولدوه قازا عينا فيه .. اها برضو في زول ضحك فيه ولا سأله .. هسع كدي خلونا من اللمبي اب دفاعا بالنظر دا ..
اها زي ما قلت ليكم حكمت معاي امشي اكل وجبة كافيار يعني ناس محمد بن نايف فرقهم مني شنو ؟ اها مشيت لمطعم السمك وناديت الجرسون وقلت ليه عايز واحد كافيار
الجرسون: معليش يا ابو الشباب دا مطعم ما اجزخانة .. الكافينول دا بتلقاه في الاجزخانة
< كافينول يكسر راسك . انا قلت ليك عايز كافيار .. امشي نادي لي صاحب المطعم ( وما يفوتكم مش نفسي كافيار .. والله ما عارفا هو شنو ولا شكله كيف)
الجرسون لصاحب المطعم: يا معلم في حفتي (حبشي) مسطول قال عايز كافينول ولمن قلت ليه دي ما اجزخانة هااج فيني وقال لي نادي سيد المطعم
.. اها اناقاعد خالف كراع في كراع وجاني سيد المطعم
صاحب المطعم: اووو ابو الشباب (نظام بيعرفني وكدا)
< اهلنا يا اخووي انتو لمن تشغلو جرسونات علموهم يتعاملو مع الزبائن
< امسحا لي في وشي بس انت وريني طلبك شنو؟
< انا طالب كافيار
< والله يا ريس انا زااتي الكفيار ما بعرفو ؟ ممكن توريني ليه شنو؟
<جيب لي قطعت سمك من اي نوع عندك وانا بوريك ليه شنو؟
< معليش منكم نتعلم انت الكافيار بتعرفو كيف
< بعرفو بالطعم بس انت امشي جيب لي السمك العندك
اها مشي المطعم وما شاء الله ما خلي ليه نوع سمك ما جابو لي
< اتفضل يا باشا ( اها انا كلمة باشا دي خلتني ملك )
< جيب لي معاك قزازة بيبسي عشان طعم الكافيار ما بيظهر الا مع البيبسي
اها انا ما صدقت من كل نوع اخد حته واشرب جقمة بيبسي واقول لصاحب السمك دا ما هو .. لمن شبعت
< والله يا معلم سمكك دا ما فيه ولا حتي ريحة كافيار .. ما في مطعم سمك تاني
< ايوا ورانا طوالي تالت ناصية في الشارع في مطعم سمك .. عليك الله اكان لقيت كافيارك دا جيب لي حتة عشان نعرفو والمرة الجاية تجي تلقاه عندنا
.. اها طلعت من المطعم وعلي البيت عدل .. ولي هسع روحي مشحتفا علي كافيار
 
رد: يوميات مدهول ، كلاكيت تاني مرة

بوست تحفه بنقلك من عالم لعالم تقول راكب طيارة
استمر في السرد ياجميل ونحن له ملتهمون
 
رد: يوميات مدهول ، كلاكيت تاني مرة

​ودخل الخروف سوق عكاظ واخذ يصرخ باعلي صوت وااا نعجتاااه ..واكتظ المكان بجميع من كان حاضرا في سوق عكاظ ..والكل يسال اين ذهبت النعجة وفيهم من يواسي الخروف ومنهم من يسخر من الخروف ومنهم من يعاتب الخروف علي اهماله وكيف انه يترك النعجة وحدها ..وكان الخروف يرد بان قصيدة الجهيمان بن معزة انسته رفقة النعجة ..وفجاءة بانت النعجة وفي فمها بقايا برسيم وهي تلوك وتبتسم في ان واحد ..ففرح الخروف وشاركته قبائل العربان فرحته وعم السلام والوئام بين قبائل العرب فرحين بعودة النعجة وقال كبيرهم فالنشرب نخب عودة النعجة وسكروا طوال الليل ..والجهيمان يشجيهم بشعره والمعزة موزة توزع في كؤوس الخمر منتشية بعودة النعجة وقرر الخليفة بن الجيفة بان يكون يوم عودة النعجة عيدا قوميا لكل قبائل العرب
 
رد: يوميات مدهول ، كلاكيت تاني مرة


....
يوميات مدهول..
عن الخلايا النايمة ح احكي ليكم
الليلة جايكم بي موضوع ملخبط حبتين .. وهو موضوع الخلاية النائمة .. اها .. ناس السياسة عندهم الخلاية النايمة دي اخطر حاجة .. يعني مثلا زي تنظيم القاعدة (الانا انتميت ليه بعد ما امريكا قفلت مزرعتي السعيدة) .. عندهم خلايا نايمة .. وطبعا الامريكان لمن تجيب ليهم سيرة الخلايا النايمة دي بيعملو استعداد بنسبة مية وخمسين في المية يعني الامريكي بيعمل حسابه بزيادة خمسين في الميه من المعدل الطبيعي هسع يجي واحد يقول ما فاهم .. طيب انا ح ابسط ليه الموضوع يعني مثلا لو واحد عندو نية يحلق راسه علي الزيرو .. كدا بكون حلق بنسبة ميه في الميه ويقوم يطلع من الحلاق ويلاقي اطفال بيلعبو بالحجارة .. ويروح حجرة طائش طاااااخ يضربه في راسه ويعمل جرح بعمق تلاتة وستة من عشرة سنتمتر .. اها كدا بكون حلق راسه بنسبة ميه وخمسين في الميه .. لو ما فهمتو نشرحا بلغة البنات .. مثلا لما تمشي الواحده تزبط حواجبه وتروح بتاعت الكوافير تحف الحاجب اليمين ولمن تجي للشمال فجاءة كدا تسمع طاااااااااااخ صوت رصاصة وتروح شايلا الحاجب كله .. كدا بتكون شالت حواجبها بنسبة مية وخمسين في الميه .. كدا الموضوع وحكاية النسب اتفهمت .. اها نرجع لقصة الخلايا النايمة .. والنوع التاني ما عايز شرح والي هو الخلايا النايمة في بشرة النساء .. يعني الواحدة لمن تشوف حالة بشرتها من اول نظرة بتعرف انو عندها خلايا نايمة .. والنوع التالت من الخلايا النايمة برضو عند البنات .. الواحدة قبل الزواج بتكون قمة الوداعة والرومانسية .. وبعد الزواج لو طلبت من زوجها اي حاجة ونساها .. تروح علي طول هايجة فيه .. اها دي كان جواها خلية نايمة وبعد ما ضمنت الزواج وفكت بورتها صحت الخلية النايمة جواها .. برضو الحشرات عندها خلايا نايمة .. يعني لو مشيت حديقة واثناء ما انت بتتونس مع خطيبتك او حبيبتك وحسيت بانها بدات تتململ اعرف انها قاعدة في خلية نمل نايمة وصحت ... واما اخطر انواع الخلايا النايمة هو النوع العاطفي من الخلايا .. هسع يجي ناطي واحد ويقول لي العواطف عندها خلايا نايمة .. ح اقول ليه ايوا عندها وهي الحب الاول وعشان ثقالتك دي ومقاطعتك لي في الكلام ما ح اوريك ليها الا بعد الفلنتاين داي...
.......ونواصل
 
رد: يوميات مدهول ، كلاكيت تاني مرة


...ظ¢....
يوميات مدهول
الخلايا النايمة المشهد التاني ..
كلاكيت اول مرة
اها الليلة قلنا ح نتكلم عن الخلايا النايمة بالنسبة للعواطف .. وقبل ما نخش في حكاية الحب الاول والخلايا النايمة .. نشوف الحكاية دي عند الحيوانات شكلها كيف .. وعشان ما يجي واحد شليق ويقعد ينظر انا ادخل ليكم في الموضوع بدون كسرات .. ومثلا يعني حكاية النملة والفيل دي عندها وجهين لمسالة الخلايا العاطفية النايمة .. لما النملة تجي في نص الغابة ولابسة فستان ميسي في خط ستة (يعني فستان فوق الركبة) وهي عارفه انو الفيل بموت فيها وتجي بدلال كدا وتقول ليه : معليش يا ابو الفلافل انا ماشه السوق ونسيت القروش في البيت ولو ما فيها حرج ممكن تديني الف دولار وتمشي معاي البيت عشان ارجعهم ليك ويقوم الفيل ما يصدق ويروح مديها الف دولار وبكل عباطة الدنيا يمشي معاها البيت ولم يصل يكتشف انو ما ممكن بي تخنه دا يدخل جحر النملة ... وتدخل النملة وتقول ليه انتظرني هنا عشان ارجع ليك دولارتك .. وتدخل من الباب الامامي وتسلم علي النمل الفي البيت وتقول ليهم انا والله جيت مارة من هنا وقلت ادخل اسلم عليكم وتتطلع من الباب الخلفي وتمشي علي بيتها الاصلا بعيد عن المنطقة دي .. وعمنا الفيل منتظر خروج النملة وتطول المسافة والفيل منتظر وبعد خمسة ساعات تجي نملة صغيرة طالعة من الجحر ويسالها الفيل عن النملة ام رموش وترد عليه النملة الصغيرة وتقول ليه : دي ما ساكنة هنا بس دخلت سلمت علي ماما وطلعت من ورا ... اها في اللحظة دي الخلايا العاطفية للفيل بتصحي ولكن بصورة تشبه صورة صحيان تنظيم القاعدة في مالي ويروح يعفص النمل من طرف ما علشان الالف دولار .. بس كل المسالة بعد عشرات السنين اكتشف انو غبي ونملة ضحكت عليه .. اما الوجه الثاني لصحوة الخلايا العاطفية في حالتنا دي هي بالنسبة للفيلة مرات الفيل لما تسمع من حيوانات الوشاية في الغابة .. انو الفيل ماشي مع نملة وخدعته ولهفت منه الف دولار .. هنا بتصحي فيها الخلايا العاطفية النايمة .. وطبعا الفيلة اكثر حكمة من الفيل .. وبتكون ردت فعلها غير ردت فعل الانثي في الجنس البشري .. اها الفيلة لما تعرف انو الفيل بخونها بتروح تعمل رجيم وترسم حنة وتشتري شاحن نوكيا اصلي للفيل ..ايوا برضو الحيوانات عندها تقدير خاص لشاحن النوكيا الاصلي .. اها دا الفرق بين الفيلة الحيوانة والفيلة الانسيه .. الفيلة لما تحس بخيانة الفيل بتصحي خلايا العاطفة فيها وبتتزكر انها انثي والمفروض تظهر بمظهر يجذب الفيل .. مش تتبهدل وتخليه يفتش للنمل .. اها دا صحيانة خلايا عاطفية نايمة ولا .. لا ..
برضو ملح ومصر انو اكلمكم عن الخلايا النايمة الصحاها الحب الاول بالنسبة للانسان بعد الفلنتاين داي....
ح نواصل
 
رد: يوميات مدهول ، كلاكيت تاني مرة

عوض

عدت لمحطة الوطن الكبير وجواي شوق مجنون .. اول من التقيته عوض المجنون .. شخصية غريبة وعجيبة .. كل الذي اعرفه عن عوض هو امه التي لم تتعب من المشي وراءه في كل مكان وانه كان طالب طب برومانيا ولكن اصيب بحالة نفسية ورحل للسودان .. كلما اطل براسي للشارع اجد عوض في انتظاري وبصوت يحمل مزيجا من الشجن والشوق والجنون يخاطبني: خالد عليك الله اديني جنيه .. ولكن في هذه المرة لم يطلب جينها بل رفع يديه قائلا : خالد شيل معاي الفاتحة علي امي ماتت .. ساعتها اصيبت بحزن خرافي لا وصف له سوي انه خرافي ولكن الجنون فنون وبنفس السرعة التي ادخلني فيها عوض لعالم الحزن اخرجني لعالم الضحك عندما قال لي : عم احمد طلق مرتو ام الحسن . وهو ضاحكا اردف: قال عشان ما كوة ليهو التي شيرت والبرمودة .. لم اتمالك نفسي فضحكت باعلي صوت متاح للضحك حتي خرج الجيران وقلت له: لكن عم احمد العرفو شنو بالبرموده والتي الشيرت دا زول سروال وعراقي ساااي .. وهو مبتسما رد عوض : اصلو الحكاية قالوا عم احمد جا البيت وقال لام الحسن شاحن النوكيا الاصلي الكان هنا وينو؟ قام ام الحسن ادتو ليه وطبعا انت عارف عم احمد متلقي حجج سال ام الحسن سؤال نكير وعشان ام الحسن عارفاهو اي حاجة بيعملوها النسوان في البيت كان عملتها ليه ولمن ما لقي حجة قام قال ليها اهاا يا حجة غسلتي لي التي شيرت والبرمودة ولا ما غسلتيهم اهاا هنا ام الحسن جاها الدستور ونهرتو يا راجل انت جنيت برمودة شنو وتي شبرت الشنو العندك عشان اغسلهم ليك وطبعا عم احمد ما بتلفت في الحجج وقال ليها طيب انا ما عندي تي شيرت وبرموده اها ود الجيران ما عندو؟ اكان تجيبي بتاعت ود الجيران وتغسليهم لي والله عشان عملتك دي انتي طلقانة بالتلاتة .. ضحكت ولم يضحك عوض وعندما اخرجت الجنيه له اخرج من جيبه رزمة جنيهات قائلا: والله انا ما عايز جنيه ناس الحلة ختو لينا في كشف عزا امي قروش كتيره . طيب اها مع السلامة ..
دي محطة الوطن الكبير في نفس اللحظة تعيش الفرح والحزن بكل تفاصليهم ...
ولنا عودات كتر
 
التعديل الأخير:
رد: يوميات مدهول ، كلاكيت تاني مرة


،، حكاية الخبير الأجنبي
------------------------
(ظ،)
.. ساعة حزن النيل وبكي حتي جفت دموعه ، ظهر الحزن النيلي في تلك الجزر التي جاءت من عدم ، بين ليل وضحاها اقتربت الضفة الغربية من الشرقية واضحي ما يفصل الضفتين امتار تغطيها مياه ضحلة ، تئن الانوف من نتانة رائحتها ، وكأن الارض تشب لتعانق الشمس لتزيد من حرارة الجو لتضيف الاختناق العام بعدا يختصر المسافة بين الرائحة والانوف المرهقة ، تفاجأ سكان البلد بهروب النيل واختصار عرضه لخصر امرأة لاتينة يكاد شبر اليد أن يطبقه ، ونتانة ما يخرج من جوفه ايقظ كل نائم ،
.... اجتمع العم باعو سيد الأسم وود دفق البول و ود الله جابو من ناحية تحت رقراق شجرة السدر التي اصبحت مجازاً علي الضفة الشرقية ، وفي الناحية الاخري قادت ست بهانة الحلبية جوقة كبيرات البلدة ، قادرلو وقمزة فوقو وبت احمد لزو وبت الجمرو وهيوفا بت قدال ، وكان هروب النيل هو الشغل الشاغل للمجلسين ، وتاه الفجور بين المعسكرين ، نساء البلدة يعزون هروب النهر العظيم لفجور رجالها وكذا الرجال يعزون نفس الفجور لنساء البلدة وكيف انهن تسببن بفجورهم في هروب النهر ونسوا أن الفجر ايضاً هرب واصبحت الظهيرة بنارها المحرقة هي الساعات الأولي لبداية اليوم ،، وبينما كأن المعسكران تبادلان تهمة الفجور سراً ظهر في افق الضفة الغربية حمار العمدة وعلي ظهره يتمايل شبحاً يميل لونه من علي بعد للون لهب نار ، وامامهم العمدة الأعرج وخلف الحمار بأمتار كان بيّن ابن العمدة يجرجر خطواته ، كانت امنية بيّن الوحيدة هي موت والده العمدة ليمتطي ظهر حمار ابيه ولو مرة ، اقترب الركب من الضفة الشرقية ، هذا الذي ابتلع جوفه الالوف من البشر والعبارات والمراكب بكل وداعة وانكسار خاضه العمدة وابنه بيّن وحماره بما حمل ، تفرجت اسارير العمدة وهو يشير لظهر حماره : جيتكم بالبشارة ، دا خبير اجنبي لقيتو تائه بين قيزان الرملة الغربية ،
.. كمن جاءهم الفرج بعد ضيق انفرجت اسارير الجمع لدرجة انهم شعروا ببرودة الجو في عز جحيم مايو ، ووجه العم باعوو سيد الأسم السؤال للعمدة : وخبيرنا دا جنسو شنو ؟؟ وقبل أن يرد العمدة الأعرج جاءت الأجابة من هيوفا بت قدال : دا من صوفو الاحمر دا بكون روسي ، وما أظنيتو تلقو زول يناضمو بمفهومية زي عبدو ود المحسية ،،
واخرج العمدة جواله وأتصل بعبدو ود المحسية ،
العمدة : حبابو عبدو ابو المفهومية الليلة جبنا ليك روسي عشان تخابرو لينا
عبدو : افتح الاسبيكر عشان اكمل ليك فهم الروسي ، فتح العمدة الاسبيكر
عبدو : اميقو ديجانقو ساراتانا
بيّن ود العمدة مقاطعاً: هاا الدلاهة الشي دا قلنا ليك روسي ما مكسيكي
عبدو : وانا جبت حاجة من راسي مش المكسيك دي عاصمة روسيا
بيّن : يا هبلولا عاصمة روسيا موسكو ، المكسيك دي بتاعت ناس اميقو
عبدو : ااااااأ وقع لي الكلام ،، دا تبع بوتين ، طيب هاكم دي ، قرنوف كلاشينكوف خرتشوف دفاعوف بالنظروف كيفوف ...فوف ،،
الجموع تصفق لرصانة لغة عبدو الروسية والفرح بعالمهم انساهم هروب النهر العظيم وبداية اليوم من منتصفه
الخواجة (بالرغم من التعب والأرهاق ، قاطع الجميع) : سكتو الأهبل دا ، انا بعرف عربي زي اللبلب ،،
اندهش الجميع
.... ونواصل ...
 
رد: يوميات مدهول ، كلاكيت تاني مرة

... مشاهد علي ممرات الهوا والهوي ....
...و للهواء ابواب ، وانا واقف في باب الهوي المكان :مستشفي رويال كير ، بين قوسين الما عندو قرش ما يفكر مجرد تفكير انو يمرض ...
.. المشهد الاول ..
(باباي) ،،كانت باباي من امهر لاعبات السلة ..تنباءة لها بمستقبل باهر في عالم الباسكيت بول .. بعد سنين من الغربة القهرية عدت ووجدتها تبيع الشاي في السوق ، ثم اختفت فجاءة ولم اسمع عنها خبر ...
.. وفجاءة وانا واقف في ممر الهوا في مستشفي رويال كير وجدت نفسي وجهاً لوجه مع باباي .. وبي طيبة ناس عطبرة مشيت عليها وهاااك يا اندياح وسلام كله محنة وشوق ومعاه سؤال وينك اختفيتي يا بت خليتي البلد ولا شنو؟ الاسئلة طلعت مني كيمان كيمان حنية مني ممكن وخفة مني برضو ممكن ، بس كانت الملاحظة هي الدهشة والقابلتني بيها باباي ، تمتمت بكلمات ما فهمت منها شئ!!! ودخلت في اضابير ممر الهوا ...
.... المشهد التاني...
... العم تركوما بتاع القش .. الراجل الحنين منذ الصغر ونحن ننتظر مجئ تركوما بتاع البرسيم .. كانت جدتي رحمة الله عليها عندها اعتقاد بأن برسيم تركوما فيه بركة بتحل علي ضرع البهائم .. ولو حصل بالغلط اشترينا برسيم من واحد غير تركوما فامامنا خيارين نرجع القش او ناكله ،، حبوبة في الحتة دي روسية عدييل ولا بتجامل ،،، وبنفس السناريو الأول سنين من الغربة القهرية وعودة ولم اجد لتركوما اثر ،،
.. بعد ذهاب باباي وانا لازلت اقف في نفس المكان بممر الهوا في رويال كير وجدت نفسي امام تركوما بتاع القش ، وقد فتح الله عليه واصبح من ذوات الجلابية البيضا مكوية (زيه وزي قيقم المغنواتي ) ووجهه يحدث عن نعمة وغني فاحش ، لكن تركوما ياهو تركوما ما بغباه ودخلت عليه بنفس حنية ناس عطبرة وكيمان الاسئلة عن الحال وسبب اختفاءه عن البلد ، رد التحية وبنفس دهشة باباي تلاشي في اضابير ممر الهوا ، وانا لم ابرح مكاني ،، ولاحظت ان طاقم المشفي بدأ يغير نظرته الي وكترو لي المحلبية ....
... المشهد الثالث ...
.. كان كباشي الحلبي اشهر تاجر قزاز (فوارغ البيرة والويسكي) وكان اكثر ما يميز كباشي الحلبي هو شنبه وعلو حماره .. كان صارماً وكنا عندما نبيع له الفوارغ نرتعش لدرجة اننا لا نعرف بكم اشتري منا ،وبنفس سناريو الغربة والعودة لم اجد لكباشي اثر وبعد ذهاب تركوما بثواني وجدت نفسي اطيل النظر للقادم ، بادئ الامر تشكتت في معرفتي له ولم اترك لتردد مجال وبنفس الحنية اتجهت نحو القادم في ممر الهوا وكتمت الضحكة عندما وجدت بأن كباشي تخلي عن اهم ما يميزه الشنب والصرامة ،، وهاك يا سلام وسؤال عن حلب عطبرة (الراجل كان شيخهم وكبيرهم) وبنفس الدهشة رد كباشي التحية ومعاها تكشيرة غير مريحة،، ثم تلاشي كما باباي وتركوما في اضابير ممر الهوا ،،وانا بيني وبين نفسي قلت (يا ربي دا منو الراقد في المستشفي دا ولما ناس اتبرا القدام )
... المشهد الرابع ...
هبلولا كدا منه رماها لي اللمبي لمن جا بممر الهواء وانا بساله عن الراقد في المستشفي : فاطنة بتك راقدا (طبعا حكاية بتك دي زكاوة غير متوقعة من اللمبي) .. هنا انا وجمت واتهجمت واتسجمت واقرب واحد سألته : انت الحاصل شنو؟
رد علي : بطلو حركات الكيزان دي ،، تسلم وتتونس مع تابيتا بطرس والجاز والغندور وتسألهم عن ناس بيتهم وتجي تقول لي الحاصل شنو ؟
... كسرة لي انا برااااي ...
غايتو عليك جنس خفة يا خالد ابو فاطنة
ترتيب المشاهد بعد النهاية،
... النهاية...
شارك في التمثيل :
تابيتا في دور باباي
الجاز في دور تركوما
الغندور في دور كباشي
خالد بيرم في دور الخفيف المربوش
التأليف والأخراج :
اللمبي
 
رد: يوميات مدهول ، كلاكيت تاني مرة

منووووووووور
ايه الحمال ده كلو
ايه الابداع ده كلو
والله واااااحشني ياود يا تهئ يا هنغاري انته
شفت كيف
 
رد: يوميات مدهول ، كلاكيت تاني مرة

منووووووووور
ايه الحمال ده كلو
ايه الابداع ده كلو
والله واااااحشني ياود يا تهئ يا هنغاري انته
شفت كيف
اهليييين ضوتنا ونوارتنا ولمن نتفرق لامنا ، انتي من الراكوبة ولا الراكوبة طالعة منك ضو ، شفتي كيفك
...... وبرضو تهي تهي تهي
 
رد: يوميات مدهول ، كلاكيت تاني مرة

دهولة فيسبوكية ليمباوية.
مما يحزنني ويؤلمني أن صديقي اللدود اللمبي خارج كل الترشيحات للوزارة الجديدة .. نحن من زمااان لمن نجي ندخل فيلم هندي قبل ما نعرف البطل منو بنسأل عن صاحب البطل .. لو ما لقيناه كومديان ولابس قميص لبني كاروهات .. بنمشي اقرب مطعم ونتعشي بي حق السينما .. الله خلقنا كدا العوير في الفيلم عندنا اهم من البطل والخيانة كلهم ..لأنو الابطال والخيانة حركاتهم حافظينها .. عارفنهم من يبدا الفيلم ولحدت ما ينتهي بكونو مدورين البنية عشان البطلة .. ولمن يفترو من الضرب الخاين بيمشي البار يضرب كاسين ويسكي والبطل بمشي الحدائق يغني للبطلة ويرقص ... الحركات دي حافظينها .. لكن عوير الفيلم دائما بفاجيئنا بنظرية زي نظرية الدفاع بالنظر ..هسع نحن بدون نظرية الدفاع بالنظر نسوي شنو؟ والله حكومتكم بدون اللمبي زي الرغيف بدون دقيق ..يعني تاني ح نشرح ونوضح لي منو .. ح نكتب كلام بين قوسين لي منو .. وح نوتسب لي منو .. خلاص لو اللمبي ما معاكم الغو الواتساب واحظرو الفيس بوك وما تنسو كمان تجيبو رادارات وقبة حديدية عشان تحرسونا . وما تنسو تقولو لي طيارين اسرائيل ولعو انوار طياراتكم لأنو غيرنا من حكاية الدفاع بالنظر ..تعالو مولعين انواركم عادي .. اما نحن ح نكتب عن الرياضة ح نمسخ ليكم الفيس بوك .. ح نخلي ليكم زي بيت العزابة المفلسين .. وح نضرب عن الطعام وتاني غير اللحمة والفراخ والسمك ما ح ناكل شي حتي التحلية ح نخليها ح ناكل تفاح وعنب ومنقة .. وهو زاتو التحلية بدون اللمبي شن طعمها .. وموية النيل زاتو ما ح نشربها ح نشرب موية صحة وبيبسي بس .. والنيل شن طعمه بدون اللمبي .. بدون اللمبي حكومتكم بقت زي مسلسل راجل وستة ستات بدون سامح حسين .. عشان كدا اي قناة ما مشفرة ما ح نتفرج عليها .. شغلنا كله ح يبقي كروت واشتراكات ..دا اللمبي عزيز وغالي علينا .. سؤال اخير .. بدون اللمبي بجلكساتكم دي ح تتصورو سيلفي كيف ؟؟؟ هسع لو اللمبي معاكم كان عملنا قوسين وشرحنا كلمة سيلفي..
...كسرة للبت الحديقة..
تتزوجيني ؟ ونتصور سيلفي بقميصي الكاروهات واوعدك ح نعيد الأنتخابات ..بس في زمنك ما في الزمن الأغبر دا
 
أعلى أسفل