Tweet

ذي ما قلت حالات صعبه جدا لمن تتذكر ,,,,,,,,,,,,,,,,,,,,,,,,,,,,,
بس انا لو كملت دراستي ان شاء الله ابقي مزارع في السودان ولا بلاد الغربه
(اسال المجرب ولا تسال الطبيب)
ده انا كنت بتمني الخروج من السودان والدراسه في في بلاد عالم واعيه ,متحضره , متقدمه
عالم بيفهم معني الانسان , عالم بيفهم معني حق الحياة , الكرامه , العيش ,حق الرفاهيه
نعم هي كلها صحيح وموجود وفي بلاد غير اسلاميه غير عربيه ,,
لكن فوق كل هذا يبقي ارض الجدود هي النواة لكل شي ,,
بس ربنا يغدر بالوحوش المسلطه علي المؤمنين
علشان اي مغترب يجد اكثر من اللي بيجده في الغربه

سلامات الفاتح


ربنا يعينكم على الغربة وعزابها

والله احنا فرشتنا مابنقدرنغيرها فما بالك تسيب بلدك عدييييييييل

والله الغربة ليها فوائد بس همها اكبر منها

ربنا يعينكم وقويكم يارب

الله يا ود علينتود الغربه دي حاره عديييييل كدا انا لي عشره سنين منتحره اهو الله يخلي الاجازات بنجي بعدها بي روح متجددة لما امشي سوق واشوف لي سودانين بحس اني عايزه اسلم عليهم واسالم عن احوالم بس وللاسفالمغتربين السودانين بقوا جافييييييييييييييييييين وبخافوا من الناس عديييييييييييييييييييييييييييل كدا

وانا ساكنه شمال الرياض والسودانين الساكنين هناك جافييين ولو في سودانين في الرياض وبالاخص شمال الرياض بقول ليهم خلوا الجفا وسلموا علي بعض في الاسواق والبقالات وبس

أخوي الفاتح بوست جميل وفيهو دفء غريب أحسسته بمجرد دخولي إليه يمكن عشان الناس بتتقوى بي بعضها
ولما يكون معاك مجموعة من الناس حاسة بي نفس إحساسك وبتبادلك نفس المشاعر وبتتفهم الانت بتعانيهو
بتشيل منك حتة الوحدة والاحساس بالبرودة التي تحسها في الغربة حتى ولو كنت في صحراء مغفرة
وجاني أنا بالذات في وقته
أنا الغربة ما غريبة علي لأني غادرت أرض الوطن وأنا ما زلت طفلة أحبو
الصعب لما تلاقي الناس الجابوك للغربة ( الوالد والوالدة ) غادروها ورجعوا نهائيا لأحضان الوطن
وقتها بالضبط بتحس إنك غريب حتى لو معاك الدنيا كلها وحواليك كل الناس البتحبهم
لكن الاتنين ديل بالذات العلاقة بيهم غير العلاقة بكل الناس
أسأل الله يديهم العافية ويطول أعمارهم ونشوفهم ويشوفونا على خير في ربوع وطننا الغالي

الفاتح والمتداخلين تحياتى
(الفقر فى الاوطان غربة
والذل فى الاوطان غربة
ورزقنا مقسوم لينا برة بلدنا )
غايتو انا كل يوم بردد الكلام ده عشان اتصبر..

اخ الفاتح كيف حالك لعلك طيب
انت مع الغربة المرة
حبوبة كانت دايما تدعو لاولادها
ربنا يحفظكم
من الحديد
و الشديد
و البلد البعيد

يديك العافية

اخ الفاتح دايمابقول عن الغربه انها بتقتل الاحاسيس بي البطئ كل ما يجي يوم جديد بحس انوا في حاجه جواي ماتت واصعب موقف مره بي لما الوالده اتوفت وزوجي كان مسافر اتخيل وحيده ويجيني خبر وفاة اعزانسانه وما القى زولا يواسيني شوفته المر دا كيف بس اطفال ماعارفين حاجه ولازم اقوم بي خدمتهم وان شاء الله يوما زي دا لايمر علي عدو ولا علي حبيب

اخوى الفاتح تحياتاااااااااى وسلاماتااااااااى كيمان كيمان
انشاء الله تلقى قدرها ريالات ودولارات ودينارات وجنيهات
كمان ***
والله موضوع سمح بلحيل وحار نار عديل كدة الواحد مابيقدر
يفوتو وفى نفس الوقت مابعرف يبدا من وين والمتاوقة والزوغة
كمان شينة زى الواحد البى يتغابى العرفة فى (كشف الواجب )
دحين يااخوى ادينى خاطرك وخلينى مرة تانية بجيك راجع

( وشكرا ليك وربنا يديك الفى نيتك )

اخوى الفاتح .. والله فعلا القصة ماقصة مال كان كتر او راح
القضية قضية معاناة كبيرة ودفع تمن اندفع من الشباب والعمر
وماساة اطفال اتربو فى الغربة ورجعو للغربة تانى فى بلدوم
الواحد لمان يفكر فيها بى عمق وبالجد يطير النوم من عيونو
وفى النهاية هى قدر وانكتب وما اقساه وامره .....
اما الجانب الاخر البى ينظروا ليه بعض الناس فلوس وغيرا
وغيرا مجرد وهم وصورة زايفة زى الانسان البى يكون
ديمة ضاحك والناس شايفنو كدة لكن فى الحقيقة داخلو
نار مولعة وحزن كبير وفراش بكا مابيترفع ديمة متجدد

خليتك عافية ياخوى ادينى خاطرك

الحلاوي والجميع لعلكم بالف خير

اولا نبدأ ليك بالمثل البيقول ( أبوك أكان طردك عمك ما بيقبلك )
وهذا حالنا حقيقي الواحد طلع من السودان مجبوووور ومكسووور أنني لا أنسى ذاك اليوم وانا مسافر والدموع والحسرة تملا المكان وقليلا من الجعير وتركب الطائرة ولا تتحدث مع احد ولا تريد ان تأكل ولا تشرب وعندما تصل بلد الغربة أول شي تفكر فيهو كراس الجوابات والقلم الكلام ده طبعا قبل ثورة الأتصالات التي غزت العالم وتجلس في الكتابة لكل افراد الاسرة تخص كل واحد منهم بخطاب منفرد ومن ثم الاصدقاء والزملاء في تلك اللحظة وانت تكتب تسترد شيئا من الذكريات تبتسم وانت تكتب وتارة العبرة تقيف في الحلق وتارة اخرى تدمع وتبكي ،،، ومن ثم تنفرد بخطابك المنسق للحبيبة وقد تلج اليك خواطر الشعر والغناء في تلك اللحظة وياحبذا لو كان هناك مسجل تسجل الكلمات للحبيبة وللاسرة بشي من الحسرة والبكاء ،،، وأصعب يوم هو أول عيد وانت بعيد عنهم تاتي من الصلاة وخاصة لو في بيت عزابة كل واحد بياخد جنب ويقعد يبكي والاشد مرارة البيكون متزوج واولاده في السودان ،،، يالله ايام عصيبة جدا
لكن كما ذكرت شيئا فشيئا يبدأ يموت الاحساس وتتاقلم على الغربة خلاص ويتحجر القلب عندما تسمع ان فلان مات أو أحد الاقارب ولا تستطيع السفر لانو ما كل زول حيتوفى حتسافر إلا تشتري ليك طيارة خاصة كل يوم ماشي وجاي فلذلك يبدا هنا الاحساس يموت شوية شوية لحد ما تصل مرحلة التحجر التام وفي بعض الناس بيصل للتبلد التام ،،،
مالك علينا فتحت فينا مواجع بنحاول نضايرها ونخبيها ونشعر باننا كويسين ونصتنع الابتسامة ونضحك والحروف محشرجة جوانا ،،، الله يزيل الغمة الفينا من وجع الانقاذ دي ونرجع لي وطنا سالمين بس لانو غانمين دي بقت ما واردة الان ،،، نرجع لي وطن يسع الكل يفرد جناحاتو لينا ويحتضنا بي ابهج صفاهو وبين النيل نلاقى مداهو ونمرح في امدر هناك ونسرح في بحري والمقيلة في الخرطوووم نجول الشوارع من غير خوف من غير رعب بكل طمأنينة فاتح ذراعك ،، وإن شاء الله ما يطيل الغربة لينا جميعا ونتلاقى في السودان كلنا وتبقى لينا ذكرى عابرة يارب

الاخ / الفاتح الحلاوى وضيوفو الكرام
بوست مميز وموضوع اكتر من رائع لسبب بسيط جدا لاننا للاسف الشديد بقينا من اكتر شعوب الارض هجرة الى شتى بقاع العالم ...
الغربه اكتر من مؤلمة وانا شخصيا بلجأ لاغانى اهلنا الشوايقة الحنينة وبقدر الامكان الواحد بيحاول ينزل سنويا والغربة طبعا اكثر ايلاما فى بعض الدول يعنى اقلو فى كمية كبيرة من الاهل والاصدقاء بيخففو عنك الكتير لكن كدا تعالو اتخيلو واحد قريبنا بيقول لى انا ممكن لايام ما اشوف سودانى ؟
والاسوأ منا ومن صاحبى اللبى فوق المغترب داخل بلدو وماقادر يعيش ويعيش اسرتو زى قال احد مبدعى الشايقيه فى رائعة عم الزين ...

عندي سؤال بالجد حيرني ونشف ريقي وراه نشاف ...
ليل ونهار شاغل تفكيري لما بقيت انا منو أخاف ...
حال الزول القالو موظف وراتبو الشهري شوية آلاف ...
لو عديت مصروفو الشهري أكيد تلقاه أضعاف أضعاف
حلو معاي المسألة دية وساعدو معاي العم الزين ...
زول محمول وعندو اطفال شان ماياكلو يجيب من وين ؟
يســرق .. ينهــب .. يشـــحد
والله كمان يغرق في الدين
عندو محمد واحمد وسارة وخمسة اطفال فوقن تومين ...
لازم يقروا وياكلوا كويس لازما يلبسوا لبسا زين
قولوا معاي يسوي شنو شان مايعيش هو يجيب وين

الفاتح الحلاوي يا رائع سلااااااامات ياااااااااااااااخ .
نحن غايتو حقنا فات في الشهر المات ، يعني الغربة ما ضقناها إلا طلبة ( ويا من خلاني قديرك يابهماً فوق غيرك ) ، كان همنا فوق غيرنا ، لكن عليك أمان الله بعد دقشنا الهم بقينا عايشين في غربة داااااخلية ، وهي أقسي وقعاً علي النفس من غربة الإغتراب أوالهجرة ، وربنا يسهل الأموروناكل من التمور إلي أن تمور .

بالجد الغربه صعبه صعبه
والوطن حنبن لكن لولا الضغوط والعطاله
ما اعتقد نفارق الاهل والاصحاب
وعندما تقرر العوده الى الوطن تجد الحال اسواء مما تركته
واول سوال انت جيت ليه وعايز تعمل شنو وهناك مش شغال ومرتاح
الجواب لا انا جايى اعمل مشروع واستقر فى ارضى
هههههههههههههههههههههههههههههه
وبعد شهر تندم انك جيت وترجع لغربتك وتانى يعاودك الحنين
ربنا يحفظك يا سودان[

دائما حرف ال ,, غ ,, دا مشكلة ويمكن يكون زي ,, الغرغرينة,,,
ما يجبرنا علي المر الا الامر منه
بس صدقوني مع مرور الزمن ممكن تتاقلم وتتعايش مع الوضع
لفووا كل الاحاسيس وفرزنوا في الفريزر في السنين الاولى .وبعدين ربنا بسير
المسيرة وبتمشي السفينة

تحية عميقة بعمق المحبة للوطن السودان والغربة كسراب بقيعة يحسبه الظمآن ماء وهي مرارة ما بعدها مرارة ألم ومرض وضغوط فأنت وحيد وان كثر من حولك احساس لا يفارقك وان تمردت عليه بكل الاسلحة من شغل للزمن ومحاولة الانصهار في المجتمع من حولك والمؤلم اخي الفاتح ان تكون لك غربتين غربة في المهجر وغربة عند العودة للوطن فكل شيء يتغير من حولك حتى البشر ليس هم البشر ويتعاملون معك كأنك من كوكب آخر عندما تبحث عن الطيبة والسماحة التي فارقتها سنيناً تجدهم يتهامسون من أين تأتون فلا انت نلت بلح الشام ولا عنب اليمن جرابي به الكثير من مآسي الغربة فكل يوم في الغربة تستطيع ان تخط به مجلدات فإن كان في العمر بقية اسرد بعض من المواقف التي تمر علينا في دول المهجر ودمتم طيبين.