Tweet

اول مرة اسمع بيها لانو زي ماعارفة احنا محس؟ وفي المحس اتربينا في الخرطوم يعني حتي لمن نمشي هناك بيعملوا لينا اكلنا بتاع الخرطوم شفتي كيف

بس ياريت تختي لينا الوصفة عشان حنعمل ملخص في الايام الجاية للاكلات بي وصفاتها ان وجدت؟

عيد سعيد؟ وحقيقة الواحد الايام الفاتت انشغل بالمنتدي السياسي ونسي العام والعنقريب بس جينا راجعين وياريت الناس ماتكون زعلت مننا

معاوية عبيد
سلامات
أنا وإنت الظاهر حنكون أصحاب أصحاب،
نأنو شنو:
بموت في القاورمة



بالنسبة ليك يا حوشة شايفك سألت عن القاورمة، وهي في الأساس ملاح بصل، المعنى إنو تعمل عمايل الدمعة العادية دي وبدل البطاطس أو البامبي أو القرع أو أي حاجة دايرة دمعة تخت البصل الصغيروني (أصغر مقاس).

دي هي طريقة القاورمة وعضة بالهنا

سها الزبير باشا،

هي؛ قصدي بت أبوها

والله مشتاق ليك شوق كميات إنتي والغزال، إنتي بس قولي الأكلة وعليك أمان الله نجيب ليكي طاريها (ما كسير تلج).

نحنا ناس فته الفول ده الساهلة ومادايرة شرح

هههه غايتو طلعت محسي بتاع خرتوم ساكت يا ود حوشة .. !! معقووولة ما بتعرف الكداد و الكرارة .. !!

الكداد يا سيدي باختصار عبارة عن نبتة طفيلية بتطبخ مع رجلة و عدس بس انما ايه تاكل صوابعك وراها !!
( بجيك ليكم وصفة كاملة ليها في منتدي الاسرة بعد ما تكلمني الوالدة ) !!
و الكرارة بتتعمل بي روب و عليه بلح مبلل و مهروس و تطبخ و تتاكل بالكسرة زي الكداد روعة بس الكرارة
دي اكلة قديمة بتذكر و احنا صغار كانت بتعملها حبوبتي الله يرحمها .. !!
تحياتي ..

حبيبنا وقريبنا الفاضل
ياخي والله ليك وحشه وشوق كميات؟
معقولة بس في ناس كده؟ بس ربنا يهون القواسي ويفضي الراس ويخفف الزحمة؟

طيب يالفاضل يعني الدمعة دي مش فيها بصل؟ تاني بنخت بصل لي شنو؟
لكن تصديقاً لمقولة الحلة بصل؟ ده بيعني انو زيادة البصل بيبقي الحة عجيبة
لا ده بفتش عليه انشاء الله

بحر
ماتاكلنا حنك او ورينا الاكلات بتاعتكم وياريت تركز علي الانواع الموجودة في بيتكم الام (الريف)

ومستنيك ما تتاخر علينا

معروف؟ من ناحية خرطومي؟ اخوك بيعترف بالكلام ده؟ بس احنا قمنا في احياء بتاعت محس؟ يعني اي حاجة من الشمالية راس؟ الا النبتات الطفيلية دي ماقامت عندنا

كيف تقول لي ملاح خطير وفي نفس الوقت تقول نبته طفيليه؟ اها لو قامت الملاح بح؟

لالالا .. هي ممكن تتزرع النبتة دي .. لاكين في الاصل بتلاقيها في الشمالية
بتنمو كدة طفيلية ( بسموها قام برااها ) .. و اكيد بتظهر مع الزراعة .. !!
و ممكن تتجفف و تتعمل ملاح بس الطازج احلي ..

العزيز إبراهيم
كيفنك أخوي إن شاء الله طيب، والله شوق كتير خلاسسسس

البصل الأولاني داك مقطع لحد ما الدمعة تبقى مسبكة إلا التاني بصل كامل صغار صغار ماهو الكبار كبار وبالهنا عليك أمان الله بعد تاكلها تتمطق

ليك علي يامعروف اجرب الموضوع ده في اول زيارة لي للشماليه انشاء الله؟ لكن شكله كده يعني ماعارف حيكون طعمة كيف؟ لكن نقول شنو حنسمع كلامك ياصحبي

يعني دي اسمه دبل بصل؟
وانت بتاكل فيها ممكن نقول البصل نزل ليك جوز عديل؟
انا شخصيا بحب البصل جدا؟ عشان كده قطع شك حتمطق ؟

بعدين يالفاضل ادينا باقي الاكلات

مساء سلامات
الكلام ده فيه كثير من الحقيقة؟ لكن هل المشكلة في الطبيخ السوداني ام في البيئة؟ انا بقول انو الانسان السوداني قدر يطوع البيئة والامكانيات المتاحة ويبدع في عمل انواع مختلفة من الاكلات السودانية الجميلة؟
السودان بلد فقير في الموارد وحتي ان وجدت بيكون صعب الحصول عليها؟ وفي مناطق الاكل فيها بيكون مخزن (بقوليات ولحمة) واغلب المناطق لايوجد فيها خضروات بصورة مستمرة (موسمية)
بالنسبة للبهارات اهو احنا احسن من الهنود وهم مشاء الله سمان وملظلظين؟ لكن المشكلة لمن البهار يجي علي اكل في الاصل هو فاقد القيمة الغذائية؟ (نواشف)
وده السبب البيجيب المصران والقرحة؟

الثقافة بتاعت الاكل هي سبب اخر؟ معاناه الناس وعدم توفر الموارد ما ادت النسوان فرصة يبدعوا ويتفننوا في الاكل؟ والخوف من الامراض بيخلينا نحمر الجداد لحدي مايبقي اسود؟


لكن تظل النقطة الاولي هي الاساس؟ انو الاكل الموجود في بلدنا اعتمد علي الاساس علي البيئه والموارد الاتوفرت للناس؟ وهنا نقول كلمة حق انو السودانين قدروا يعملوا من الفسيخ شربات علي قول المصريين

الفاضل
شنو ماقلنا في الانتظار لعبدالله الشبراوي
انت وين ؟

أخوي إبراهيم
والله ما مني لكيييييييين!!!!!
عارف الشغل (العصر) هنا مرات بكون حكايتو حكاية، وفي البيت ما عندي نت، عشان كده بسرق اللحظات الصغيرونة من الشغل وبدخل أشوف الحاصل شنو، وإن قدرت أرد رديت وإن ما قدرت غايتو مخير الله في خلقو.

بالنسبة لي باقي الأكلات دي تفصيلاً تفصيلاً كدي في الحاجات البتعجبني وبعملها طوالي

الفول المتبوووووووووخ (مش المطبوخ):
وده يا سيدي تجيب ليك تلاتة بصلات حجم اعتيادي كده وتقطعهم وتديهم النار مع شوية زيت وأريتو زيت سمسم (تلقاهو يفور ويعمل ليك رِغو رغو بكسر الراء) ونمن يقرب يدوب تديهو طماطم وياريت تكون مخلوطة مع شمار وتوم وفيها شي كده من الشطة الخدرا وتروح كابيها على البصل تخليها شوية كده وبعد داك تكب الفول تخلي عصارة الطماطم دي تتخلل الفول وبعد ما كبيت الفول بي شوية كده أديهو صلصلة بسيطة نأنو إنت كابي طماطم بعدين (عن نفسي أنا بخت لي مكعب بتاع مرقة ماجي بالدس) نأنو أختي ما بتريد تخت ماجي وياريت تاني تديهو توم وتخليهو في النار شوية وبعد داك لهطي صاح مع الشطة الخارجية.

صينية الخدار:
أكتر السودانيين بعملوها باللحمة إلا أنا ما بريدها باللحمة، أنان كده بعملها كالآتي:
أولاً بالتبادي بعد ما قطعت الخدار اللي هو: (بصل كبار، طماطم كبار وقوي، فلفلية كبار، جزر، كوسا، شطة خدرا تفتحها النص بالنص، شمار أخدر، بقدونس) تقطع الشي ده كلو مع بعض ما عدا الشمار الأخدر والبقدونس ده بتختو آخر شي بعد ما تقطعو دقاق دقاق والخدار التاني ده بتقطعو كبار كبار، خليهو بعد كده على جنبة وأمشي أعمل (الصوص) بتاعك صوص دي بس عاجباني تجيب ليك طماطم لين تخلطو في الخلاطة مع التوم والكسبرة وبرضو بخت لي فوقو مكعب مكعبين من المرقة أليلت ماجي بعد ما اتخلطت كبها في الخدار بتاعك على حسب الكمية الإنت دايرها صينية كبيرة صوصك حيكون كتير شوية وتشيل وتلخبت الشغلة كلها مع بعض بي يدينك وتكب ليك فيها شوية زيت عشان التلصق في الصينية بعد ما كوجنت الشغلة تمام أديها النار في الفرن وإن كان مافي فرن أحسن حاجة كانون تخلي الصينية دي فوقو زي نص ساعة
(الشمار الأخدر والبقدونس نسيت أقول ليك تكوجن حاجة منها مع الخدار كلو وبعد الكوجين الباقي تكبو بي فوق)
مواصلة لما قبل القوسين:
والنار تحت الصينية وفوقها تخت ليك صينية تانية وتخت ليك جمر فوقها (والله دي بتطلع أحلى من الفرن) لكن الساهل الفرن، المهم تديها نار وكل مرة تجي تشوف البطاطس والجزر تديهو طعنة كده بالملعقة لو الملعقة مشت معاك طوالي معناهو الشي ده نجض نأنو شنو: الجزر ما بنجض بالساهل.
بعد داك تجيب ليك شطة خدرا تدقها في الفندق ومعاها شوية توم وتديها ملح وليمون وأكان في دكوة دي الحمرة والحلا زاتها، بعدين لمن تجي تشيلها من الصينية ما تشيلها بي كمشة ولا ملعقة، في حاجة كده مفلطحة وفوقها أخرام شخوت شخوت عشان ما تكسر ليك الخدار وتختها في الصحن وتقعد تتحكر في الواطة دي شغلة الكرسي ما بنفع فيها نأنو شنو حتاكل كمية ما حتتخيلها.
وبي الهنا والشفا

الله يجازي محنك يا إبراهيم أخوي والله فطرت قبل شوية لكن بتذكر ليك في الحاجات دي جعتا تاني.

الفاضل كلامك ده كلام خبراء عديل
يعني ده ماوصف زول شاف ولا سمع؟

ده كلام زول بيعمل الحاجات دي عديل؟ نان كده خليك جاهز اول زيارة انا قافل علي صينة الخدار خداري

ياودحوشه إنت نسيت أيام كان قاضي السجن وكانت سها تظبط ليك الطيبات وتجيبها لي كوكو وتتذكر لما نتشاكل في البطاطين وهروب عظمة غايتو كانت أيام

فضولي لكن مالقيتك بتاع حلل

سلملم

أصلو ما عليك وكت ما تجي قفلتك على صينية الخدار دي شايفها قفلة كرت بين جوكرين، بس جيب لي معاك شمار أخدر،
نأنو شنو:
الشمار هنا ما فيهو ريحة

الحاجات الباقية اتفقو إنت وتندلقي حن أكتبوها في لستة أنان ما تدبلو الحاجات

وإن دبلتوها خير وبركة

يا حنين، سلام والله
إنت بس تعال لي جاي إنت بالذات بأكلك أكلة أهلنا البطاحين ما عارف بسموها شنو لكين هي عصيدة بي طماكم وزيت سمسم وتوم وبصل وشوية شمار وكن داير فيها دكوة أو بدون والله نمن أمي تسويها لينا بنعمل هجوووووووووووووووووم وما نخلي فوقها الحبة.

بعدين يا أخوي نمان تكون في المطبخ مع الحاجة الله يديها لينا العافية والصحة من صغيروني كده نمن تكبر أكيد حتاخد خبرات، إن داير العصيدة دي بالدكوة بس جيب معاك الدكوة



والدقيق


وزيت السمسم


والبصل


والتوم


وأهم زول ما تنساهو (الشمار)


وأسألني من الباقي

انت عارف سلملم دي زكرتنا ايام جميلة خالص


اقفل علي كدة ياصحبي لحدي مانشوف اخر الحلل شنو

الفاضل ياصاحب
اخوك رجع ليك من تاني

انا بجهز ليك الشمار وباقي الحاجات بس انت خليك جاهز؟

لي كم يوم كدة باكل لي في مطعم يمني يعني مندي في مندي

الواحد حاسي نفسه جعان شديد

بالنسبه للموليتة دي بيفرموها بالمفرمه حقت الملوخيه بس ماتكون ناعمة شديد يعني وسط وفي حالة ماتوفرت عادي ممكن بالجرجير يبقى

تقوم بعد داك تعمل ليها دكوه وملح وشطة وكمان تقطع معاها بصلة كده ناااااااااعمة وتعصر فيها ليمونه وتلخبطه مع بعض

تكون سويت الموليته

سوسو تسلمي بس ممكن تورينا ممكن لقاها وين يعني في منطقة من السودان والقبائل البتاكلها او المدن البيقدموها في المطاعم عشان تعم الفايدة؟

موجوده في ولاية الجزيرة وبياكلوها كل سكان الجزيرة

لكن ما أعتقد إنها بتكون كتوفرة في المطاعم لأنها بتتاكل زي تسليه كده

سوسو تسلمي ياستي وانشاء الله الواحد لو رجع السودان يسال منها
وياريت تواصلي معانا في البوست وتدينا انواع اكلات اخري

ما دام بتجهز معاك الحاجات كلها ما عليك تعال علينا جاي وقول الداير تاكلو شنو، إلا أعفاني من اللايوق ما بعرف أعملو أي حاجة تانية أشر عليها بس (دمعة، ملاح بطاطس، بطاطس باللحمة المفرومة، قاورما، شية جمر، شية صاج، كفتة، كفتة بالستارة، سمك، كوارع، فسيخ، باكمبا، سخينة عادية وسخينة بالدكوة، عصيدة بعملها لكن ملاحها لأ والعصيدة زاتها نوعين، كمونية رغم إني ما بريدها لكن إن طلبتها بسويها ليك، سلطات بأنواعها حتى بتاعت الرجلة والبرسيم) آآآآي قريتها صاح يا ود حوشة برسيم ما حاجة تانية والله فيهو حلات سلطة


ويازول تعال والدايرو بتعمل ليك ما عندك أي عوجة، ود خالتي الأيام دي معاي وده يا معلم بتاع اللايوق تخصص

وإن بقيت داير الكوارع يا أخوي جيب لي معاك حلة بريستو

تسلم ياحبيب

يعني كلامك الجميل ده تقولة بعد مارجعنا من السعودية؟ وبعدين القال ليك انا باكل ليك برسيم منو؟ قال برسيم قال؟ هاهاهاها
ماخلاص الواحد رجع البيت لام العيال ولقينا الحاجات كلها؟
بس قبضناك قلت شنو؟ باكمبا؟ كمونية؟ كوارع؟ قاورما؟ سخينة؟ وزيد عليهم البرسيم ياصحبي
انا واعضاء الراكوبة حنكلب منك انك تكتب الوصفات بتاعت الحاجات دي هنا في البوست عشان نعرف
يعني كدي اتخيل بعد ماتكتب الكلام ده ويكون في عزابي قاعد في لندن ولا السويد وفجأة وهو فاتح الراكوبة يلقي البوست بتاعنا ده؟ ويوقم يعمل ليه سخينة بالدكوة؟ اتخيل حيكون مبسوط كيف؟

اجمل حاجة بتزكرها في موضوع العضة

العدس؟

انا كنت بحرق العدس؟ قادرين تتخيلوا زول بيحرق العدس؟ القصة بدت اني كنت قاعد في البيت بتاع العزابة ؟ قعدت مع شباب سودانين الله يطراهم بالخير ويديهم العافية؟ وبما اني كنت اول زول بيرجع البيت؟ كنت بنضف المطبخ خاصة انو الشباب المعاي كانو شغالين؟ زبما اني كنت طالب فقررت اني اساعد الناس ديل باني اغسل العدة بتاعت المطبخ؟
الشباب ديل طلعوا طباخبن لدرجة اني خجلت اقول ليهم بعرف الطيارة قامت؟ لانو طلعوا زي اخوي الفاضل ده معلمين بتاعين لايوق وفرن وقصص؟
قررت اني اتعلم الطبيخ وقلت ابداء بالعدس ؟ ويارتني مابديت؟

قلت العدس ده خفيف ولزيز ومابيكلف حاجة وما محتاج زمن واخدت لي الوصفة من واحد فيهم؟

اتخيلوا حرقت العدس؟ في زول بيحرق العدس

الناس الايام دي شكلها شبعانة ولا شنو؟

هسى فى زول فى الدنيا دى كلها بيعرف الكمونيه ولا الباسم (راس الخروف ) ولا بيشرب حلو مر هسى دا اسم عصير بالله

ماجد سلامات
كيف يعني انت قايل الناس دي من وين ماكلها من اتربت في الريف وعندها اكلات ناس الكمونية والباسم ديل حاجة راقية جداً

ارجع في البوست للخلف شوية وحتشوف اكلات غريبة جداً انا عن نفسي تفاجأت بيها وماعرفت نصها؟

بالمناسبة مرحب بيك كتير وشرفت

الواحد مسكتة جوعة لقي نفسه رجع لي بوست العضة ده من تاني

اها الحاصل شنو ياناس كنا واقفين وين؟؟؟؟

اها دى الكرارة زاتا

نجلاء
مالك علينا بالغتي عديل كدة؟

شهيتينا العضة زاتو؟

انتي عارفة الصور المستفذة دي بتخلي الواحد يقفل الكمبيوتر ده ويشوف ليه مكان ياكل فيه

السلام على البطون البتقرقر
من الوجبات المعروفة:أم بقبق-وام شعيفة-والتقلية-وأم دقوقة-والويكاب- والكوارع-الوريق-والورق-والسبروق-والكداد-ولسان الطير-وملاح الجرجير-وملاح البيض-القراصة-البكة-الكسرة الرقاق-الكول -الكمونية- الكومرس-قادو قودو-والقورو-لوبا حلو-ولوبا عفن-الملوخية طبيخ ولا مفروكة-الكجيك-ملاح الروب-الرجلة وما أدراك ما هي بالعدس ولا مفروكة بالويكة - أما الملوحة فأنا آكلها صحوا حتى تدق البطن فرامل فامسح يدي دون غسيل ثم اضعها تحت رأسي لاحلم بها نائما
تحياتي ومودتي..

عبد الناصر ياخي انت من زمان وين؟

في كتير من الاكلات التي ذكرتها موجودة في البوست لكن في وحدات جداد لنج؟

بالله عليك تكلمنا عنهم لانو احنا شكلنا اولاد بندر ساي؟
وزي ما اتفقنا انو الاكل بيختلف باختلاف المنطقة والامكانيات المتوفرة فيها فياريت تورينا مكان كل اكلة من الاكلات دي وانا قصدت الاماكن المشهورة بيها هذه الاكلات حيث ان هنالك العديد من الاكلات التي وجدت رواج في السودان وانتشرت بصورة كبيرة

الصورة دي تم التقاطها في اول يوم عيد ضحية وافتكر الشية بتوضح الكلام ده

سوف اقوم بانزال بعض الصور وجدتها عن طريق البحث في عمنا قوقل وهي بالتاكيد من مواقع سودانية مختلفة

اتمني انها تعجب الناس

الصحن الفوق دة بيجوع الواحد الحمدلله ما فتحناة في رمضان

رجعنا للعضة من تاني

شكلة المكبوس ده حينسينا العضة السودانيه زاتو